Hawraande yowitiinde e ngonka Mali

0
374

– Sabu teskaade jiiɓru e kulɓinagol ngonka Maali hannde ;

– E teskaade jiiɓru ɗum waawi jibinde e mawnugol kaan ngonka feewde e Muritani e denndaangal leyɗe Saahel ;

– Sabu himme gonɗo e artirde jam e nder renndo Maali tawa ina gaddii ngootaagu ngenndi, kisal leydi mum, tawa kadi ina danndi demokarasii oo e kisal ɓiɓɓe leydi ndi e jawɗeele mum en ;

– E teskaade lor mawɗo mo ɓesnguuli rewo mali lori gila nde dillere konuyaŋkoore nde fuɗɗi, lor yimɓe hoɗɓe toon ɓe e boomagol jawdi mum en tawi saabii ɗum ko goomuuji konuyaŋkooji ownooɓe hakkilaaji jiidaani e njeeyguuji ɗi ndagaaki ɗi ɓe mbaɗata ;

– E teskaade golle dille konuyaŋkooje ownooɓe hakkillaaji to rewo Mali, ƴellitooɓe miijooji niɓɓi, daraniiɓe leɓtude hoɗɓee e nokku he e sahaa nde leydi ɓiɓɓe yummiraaɓe men feƴta, huunde nde jaɓnaaki.

– Sabu himme jojjuɗo e rokkude kala leñnol hakke mum e fonndude ɗum en ;

– Sabu men kadi teskaade bonannde nde darnde Muhammed wul Abdel Ajiiju e ballondiral mum e Sarkosii addani leydi mali e sahaaji nde o naatnata toon larme makko o waddi moojobere won dille e nder diwaan ASAWAAD, ɗum ina jeyaa e ko saabii ɓeydagol toon caɗeele e batte bonnugol jam e kisal e nder nokku he ;

– Sabu teskaade nafoore wonande moritani e moritaninaaɓe kala jam e kisal to Maali fawaade e jotondire taarikyaŋkooji gonɗi hakkunde yimɓe men e kuutondire keewɗe, naftooje gonɗe hakkunde leyɗeele men teeŋti noon to bannge ngaynaaka ;

– Teskaade ballal ngal Moritani e moritaninaaɓe poti addude ngam ndaartude peeje nuunɗuɗe jumtooje danndooje jam e deeyre e koddigal moƴƴal hakkunde leyɗeele ɗe e hakkunde ɓesnguuli saahel ;

HEERTO (Parti) UFP rennduɓe e batu mooɓondiral 3ɓal e ñalɗi 27, 28, 29 e 30 deesammburu 2012 ;

– Ina luulndi kuutoragol doole wonande kala leñol ngam yiɗde ñawndude caɗeele koddigal ;

– Ina hiisi wonde Maali ina foti heptude denndaangal leydi mum ;

– Ina waggina hoohooɓe Mali e ardiiɓe partiiji nde mbaasata yeebaade ndaartugol deeyre tawa ko e maslaha sabu hare e nder diwaan he ko bonannde mawnde teeŋti noon wonande Moritani ;

– Ina waggina gollotooɓe politigi to Maali, wonɓe Bamakoo e wonɓe rewo nde ndaartata hakkunde mum en peeje jumtuɗe, duumiiɗe ngam ñawndude caɗeele hakkunde maɓɓe tawa eɓe teskoo potal hakkunde ɓiɓɓe leydi, hakkunde leƴƴi tawa ko e dow kormondiral, kaaldigal e nanndiral ;

– Ina luulndi kala ownooɓe hakkillaaji, kala miijooji niɓɓere e golle njulaagu ngu dagaaki e warngooji yimɓe e teetgol jawdi mum en ;

– Ina suurta darnde laamu moritani saabiindu bonannde jolnde to Maali to haa yettii ɗo njaaraten ɗoo ;

– Ina wasiyoo denndaangal doole ngenndiyaŋkooje e demokaritiyaŋkooje saahel nde kaɓɓondirta e malinaaɓe ;

– Ina waggini yiilirde siinoore nde nde hirjinta ɓesngu ngu kala, pelle politigi ɗe e pelle renndoyaŋkooje mbele ina kanndoo keeri leydi men, caloo yoo leydi ndi mool tuddule goomuuji ownooji hakkilaaji ;

– Ina wasiyoo yiilirde siinoore nde nde sakkata kala peeje mbele Moritani e moritaninaaɓe ina ndannda jotondiral moƴƴal hakkunde leyɗeele saahel e saahelnaaɓe.

Nuwaasoot ñande 27, 28, 29 e 30 deesamburu 2012

Batu Mooɓondural